ខេត្តព្រៃវែង ៖ បុណ្យចូលព្រះវស្សាគឺជាពិធីបុណ្យដ៏ធំមួយរបស់ព្រះពុទ្ធសាសនាដែលនឹង ចូលមកដល់នៅពេលឆាប់ៗខាងមុខនេះ ពិធីបុណ្យនេះប្រារព្ធធ្វើឡើងជារៀងរាល់ឆ្នាំនៅក្នុងកំឡុងរដូវវស្សា ជារដូវភ្លៀងដែលប្រជាពលរដ្ឋក៏ដូចជាព្រះសង្ឃពិបាកក្នុងការធ្វើដំណើរ និងនិមន្តពីទីកន្លែងមួយទៅកន្លែងមួយ។ ព្រះពុទ្ធជាម្ចាស់ទ្រង់ត្រាសដាក់ឲ្យព្រះភិក្ខុទាំងឡាយចូលវស្សា រយៈពេលបីខែដើម្បីសិក្សារៀនសូត្រពីធម៌ដោយពុទ្ធបរិស័ទជាអ្នក ទំនុកបម្រុងព្រះសង្ឃនៅក្នុងកំឡុងពេលចូលវស្សាបីខែនេះ។
ដោយមានការគិតគូរនិង យកចិត្តទុកដាក់អំពី សុខទុក្ខ នៃការរស់នៅ របស់ប្រជាពលរដ្ឋ ក៏ដូចជាព្រះសង្ឃ ក្នុងវិស័យព្រះពុទ្ធសាសនា ពីសំណាក់ ក្រុមការងារគណៈកម្មាធិការបក្សប្រជាជនកម្ពុជា ខេត្តព្រៃវែង ក្រុមការងារ ស្រុកឃុំ ទើបនៅវេលាព្រឹកថ្ងៃទី ២០ ខែកក្កដា ឆ្នាំ ២០១៦ នៅវត្តព្រៃអង្គុញ ឃុំព្រៃកណ្តៀងស្រុកពាមរក៍ខេត្តព្រៃវែង ឯក ឧត្តមស្បោង សារ៉ាត ប្រធានក្រុមប្រឹក្សា ខេត្ត សមាជិកក្រុមប្រឹក្សាខេត្តព្រៃវែង រួមនឹងក្រុមការងារចុះជួយឃុំព្រៃកណ្តៀង បានអញ្ជើញ យកទៀនវស្សាមកប្រគេនព្រះសង្ឃ គង់ចាំព្រះវស្សា នៅវត្តព្រៃអង្គុញ ឃុំព្រៃកណ្តៀងស្រុកពាមរក៍ខេត្តព្រៃវែង។
ពិធីនោះដែរ មានការអញ្ជើញនិមន្តចូលរួមយ៉ាងកុះករ ពីសំណាក់ ព្រះសង្ឃ លោក អ៊ុក សំណាង ប្រធានមន្ទីរកសិកម្មខេត្ត លោកអភិបាល ស្រុក លោកមេឃុំ មេភូមិ កងកំលាំងនគរបាល ប្រជាពលរដ្ឋជាពុទ្ធបរិស័ទ និង ក្រុមការងារចុះជួយឃុំ ជាច្រើននាក់ផងដែរ ។
លើសពីនេះទៅទៀត ក្រោយពីការសំណេះសំណាលលចប់ ឯក ប្រធានក្រុមប្រឹក្សាបានប្រគេននូវទៀនព្រះវស្សា សម្ភារៈគ្រឿងឧបភោគ និង បច្ច័យ ដល់ព្រះសង្ឃដែលគង់នៅទីអារាមវត្តនៅវត្តព្រៃអង្គុញ ឃុំព្រៃកណ្តៀង នាឱកាសនោះផងដែរ៕